محرابه يجُر حسره ( لأستشهاد الأمام علي عليه السلام )

بسم الله الرحمن الرحيم
اللهم صل على محمد وآل محمد وعجل فرجهم

محرابـــــــــــــــــه يجُـــــر حســــــره

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يصيح الآه --- يصيح الآه === محرابه إو يجُر حسره
شلون أنساه --- شلون أنساه === طبرتْ هامته الشفره
ــــــــــــــــــــــــــــــــــــــــــــــــــ
علي حبّه يناغيني == كُبر ويّاي من زغري
علي الصوته يناديني == وظل أسمع إلَه عمري
علي إحلامي وإسنيني == يظل دمّي إبهواه يجري
علي روحي إو نظر عيني == أزوره إو ينطفي جمري
أظل أهواه --- أظل أهواه === أزوره إو أعتني الحضره
شلون أنساه --- شلون أنساه === طبرتْ هامته الشفره
ــــــــ
علي إبسيفه إستقام الدين == ما ثنّه أبد ضربه
علي والد حسن وإحسين == ليش إلتمّوا الحربه
علي عالحق أبو الطيبين == أبد ما خالفه الربّه
علي مولاي نور العين == عذب ما ينمحي حبّه
يصيح التاه --- يصيح التاه === إحضرني يبو العتره
شلون أنساه --- شلون أنساه === طبرتْ هامته الشفره
ــــــــ
علي إبسيفه كشف ظلمات == عن وجه النبي المختار
علي الما ذل أبد هيهات == بس للواحد القهّار
علي عالضيم أبد مَيْبات == بساحات الوغى الكرّار
علي البنص شطر هامات == راواها اللظه والنار
جبير الجاه --- جبير الجاه === محّد يوصل البحره
شلون أنساه --- شلون أنساه === طبرتْ هامته الشفره
ــــــــ
علي ميزان بين الناس == ما يظلم عدل حكمه
علي منصور ما ينقاس == ولا واحد وصل حلمه
علي مرفوع دوم الراس == حلو المنطق عذب إسمه
علي غيره إنمله إو إحساس == يشع وجهه إبأرق بسمه
أعيش إوياه --- أعيش إوياه === عشق حيدر برد جمره
شلون أنساه --- شلون أنساه === طبرتْ هامته الشفره
ــــــــ
علي إتمنّه الشهاده دوم == كضه عمره يحن ليها
علي محرابه دامي اليوم == بالسجده إو حظه بيها
علي إبسيف الغدر ملجوم == مضه مطبور حاميها
علي إتحمّل رزايا إهموم == هالدنيه إو مآسيها
غُمض عيناه --- غُمض عيناه === محفوف إبكُبر صبره
شلون أنساه --- شلون أنساه === طبرتْ هامته الشفره
ــــــــــ
علي ودّع حسن وإحسين == ودّعها العقيله اليوم
علي نادى ينور العين == ياعبّاس يالجيدوم
ما ريدن يمُر البين == بختك ما تشوف إهموم
كفيل إنتَ إو أعرفك زين == أبو الغيره شهم موسوم
رُفع يمناه --- رُفع يمناه === ودّع وإختفه بدره
شلون أنساه --- شلون أنساه === طبرتْ هامته الشفره

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مغ تحيات شاعر اهل البيت / جابر النجفي
إسمعوا القصيده بصوت الرادود مصطفى الخزاعي على هذا الرابط

http://www.wlidk.net/dld4fv19615.mp3.html
م/ن

» الحسين ( عليه السلام )
» سؤال النصراني للإمام الصادق عليه السلام عن تعداد العظام؟
» سجل دخولك بالصلاة على النبي ( صلى الله عليه وسلم )